Dertgira nauscha
Suenter rodund 200 onns ha l’Uniun da tscheiver Mustér puspei schau reviver la Dertgira nauscha igl onn 1987. Dapi lu vegn puspei fatg mintga onn dertgira a Mustér. Ils derschaders laian repassar a moda humoristica schabetgs digl onn vargau. Ei vegn tratg tras il tschariesch tut quels che han meritau ei. Il punct culminont ei mintgamai la sentenzia. Quella finescha adina cun pender in delinquent vid la fuortga.
La Dertgira nauscha ha liug dapi entgins onn daniev il venderdis tscheiver. Ils derschaders vegnan mintgamai accumpignai il stab dil Prenci tscheiver e las guggas sin plaz scola, nua ch’ina gronda raspada spetga gia.
200 onns negina Dertgira nauscha
Sco quei ch’ins sa leger el cudischet «Ils nums locals da Mustér» da pader Ambros Widmer, ei igl usit dalla Dertgira nauscha tschessaus entuorn igl onn 1780. En quella interessanta publicaziun constatescha igl autur: «Gnanc tgisà buc, lunsch ora il pli bi usit fuva quel dalla Dertgira nauscha che vegneva daus mintga dus, treis onns per gliendisdis tscheiver sut la participaziun digl entir pievel giuven buca mo da vitg, mobein era dils mats e dallas mattauns dils uclauns ed uclivas.» Ils giuvenils serimnavan, sevestgevan e serendevan lu en in til e da buna luna el coc dil vitg. Leu haveva la dertgira allura liug. Pader Ambros scriva: «Ed ussa entscheiva ina dertgira d’ina vivacitad e spirtusadad ch’ins sa ir ad encurir enzatgei aschi genuin ed actual, setracta ei gie buca mo da truar la terribla cureisma e da liberar e defender il legher Prenci tscheiver, mobein era da tinglar ed ironisar tut ils eveniments e schabetgs pli curios: politics e socials, capitai duront in onn ora.» Suenter la dertgira nauscha vegneva saltau e stau si da frestg entochen ch’il zenn grond dalla baselgia parochiala da S. Gions deva las dudisch. Ussa stueva il Prenci tscheiver svanir ord la tiara e far plaz alla cureisma. (Hans Huonder, La Quotidiana dils 15-2-2007)