La sonda, ils 24 da fevrer 1979 ei gl’emprem slalom internaziunal dalla FIS “Péz Ault” staus a Caischavedra. A caschun da quel ha l’uniun da cura e las uniuns indigenas organisau ina fiasta populara cul motto “Tscheiver-Fastnacht”. Suentermiezdi han ils tamburs accumpignau il til d’affons, suenter han las uniuns dil vitg ed ils hotels organisau ina fiasta populara el vitg cun stans. Digl emprem til da tscheiver han 200 affons fatg part. In comité ei vegnius installaus che ha giu d’organisar las proximas fiastas da tscheiver. 1983 dat ei igl emprem protocol dall’uniun da tscheiver, la radunonza da fundaziun ha denton giu liug ils 5 da fevrer 1984.

 

El decuors dils onns ha ei dau differentas midadas pil tscheiver a Mustér. La fiasta dalla sonda-sera ei vegnida disloccada dalla halla Cons ella halla dil Center da sport e cultura perquei ch’ei haveva buc avunda plaz. Aschia ei era la ruta dil til vegnida midada. Enstagl dad ir tras il vitg e puspei anavos tier la halla Cons meina quel dapi lu naven dalla staziun el Center da sport e cultura.

 

La Dertgira Nauscha ei renaschida 1989 suenter circa 200 onns, la SIBLA ha puspei entschiet a cumparer 1996 suenter ina pausa da 15 onns. Naven da 1999 ha ei dau sault e divertiment gliendisdis-tscheiver suenter la Dertgira nauscha en halla a Cons. Quella sera da sault ei lu puspei vegnida annulada 2012. La raschun persuenter era ch’ins anflava neginas uniuns che organisavan quella sera da tscheiver ed era igl igl interess perseunter ei ius anavos.

 

Il medem problem ei semussaus culla sonda sera da tscheiver. Naven da 2012 ei quella sera vegnida organisada dallas Bagordas, las Fifferlottas e l’Uniun da tscheiver. 2016 ei l’Uniun da tscheiver seretratga da quella organisaziun perquei ch’ei maunca commembers. Ina decisiun ch’ei curdada suenter ch’ins ha insumma studegiau alla radunonza generala 2015 da sligiar l’uniun. Igl ei vegniu ponderau da far enqual midada e mantegner vinavon l’uniun. Quei cunzun per era vinavon far la Dertgira nauscha ed edir la SIBLA.